8-11 oktyabr tarixlərində keçiriləcək 3-cü “Korkut Ata” Türk Dünyası Film Festivalının müsabiqə proqramı çərçivəsində “Məryəm” tammetrajlı bədii filminin premyerası keçiriləcək.

Mədəniyyət Nazirliyinin dəstəyilə Cəfər Cabbarlı adına “Azərbaycanfilm” kinostudiyasının “TRT” və “Sinema evi” ilə müştərək istehsalı olan “Məryəm” filminin nümayişi 10 oktyabr 2023-ci il tarixində 19:00-da Nizami Kino Mərkəzində baş tutacaq.

Filmin ssenari müəllifi və rejissoru Elçin Musaoğlu, prodüseri Fariz Əhmədov, təsvir rejissoru Orxan Abbasov, quruluşçu rəssamı Zaur Abdullayev, bəstəkar Azər Hacıəsgərlidir. Əsas rolları Təhminə Rafaella, Ayşad Məmmədov, Zaur Şəfiyev, Ərtoğrul Kamalov ifa edirlər.

Ekran əsərinin süjet xətti baş qəhrəmanın uzun illər sonra atasını axtarmaq üçün Azərbaycana gəlişi üzərində qurulub. Belə ki, atasını ucqar bölgədə yerləşən psixiatrik xəstəxanada tapan Məryəm, yeni reallıqla üz-üzə qalır ki, bu zaman da ortaya “nə etməli?” sualı çıxır.